( مشكلتي. انا مابحب الخير للناس)


طيب انا مابتعجبني  الحاجات السمحة والكويسة البتحصل للناس 
اي شي سمح بحصل ليهم انا مابعجبني 
 يعني مثلا لو سمعت ناس فلان جابو ليهم حاجه مابكون مبسوطه ولو في بت من الحي خطبوها والله مابفرح ليها المشكله شنو يعني  انا عايزه انبسط للشي الكويس البحصل لغيري بس بلقي نفسي مامبسوطه
 مثلا لو حصل ليهم شي ماسمح والله مابتاثر كتير
عاوزه اعرف ليه انا كدا وكيف اتغير للافضل?
.
.
.
.
.
.
.

تحية طيبة الاخت الكريمة
 
انت عارفة ياختي  حب الخير للناس   دا حاجة عظيمه خلاص ومحتاجة شخصية استثنائية  
 وانا والله هس بكتب في السطور دي سرحت بخيالي وعملت استدعاء كدا للشخيصات  الخزنتها سلفا في  ذاكرتي ورجعت للوراء وحاولت اتذكر كل الشخصيات المحبوبة اللاقتني ومرت علي في حياتي دي لقيت منهم  الخال ومنهم الصديق ومنهم الاستاذ ومنهم الجار ومنهم........ ومنهم .......
وحاولت اتذكرت حركاتم وبسماتم وضحكاتم وطريقة كلامم واسلوبم واهتمامم ومواستم للاخرين 
المهم اتذكرت كل التفاصيل الخلتم محبوبين لقلوبنا كل التفاصيل الخلتم ناس متفوقين 

فسآلت نفسي ليه ماسر هذا التميز وسر هذا القبول بين الناس?
فخمنت الاجابة 
انهم  الناس ديل دائم بعملوا الحاجات السمحة بدون تكلف وبدون مقابل ( اهم حاجه مميزاهم بدون مقابل دي)
 بضحك معاك بدون مقال
بفرح ليك بدون 
بواسيك بدون مقابل
بكرمك بدون مقابل
بهتم بيك وبسآل من احوالك بدون مقابل
بوكلك بدون مقابل
بشربك بدون مقابل
بدفع ليك في المواصلات بدون مقابل
ممكن اساهر معاك وانت عيان بدون مقابل 
بجيك في افراحك بدون مقابل
بقيف معاك في احزانك بدون مقابل
ضحكتم  دايما نابعة من اعماقم من غير تكلف 
مابتصنعوا الظرافه قط
تحس الجواهم برا  والبرا جواهم 
والجواهم علي لسانم 
كانو راحتم  دي في راحة الاخرين  
....... ياسلام عليهم ربنا ارزقنا قبول الاخرين 
حتي الشخصية دي لم تغيب الناس كلها بتتأثر بي فراقا دا حتي الحي او الحته بتبق مضلمة كدا وكاسيها  السواد  وتسمع حديث الناس اقول ليك ياسلام مااظن حوا تلد  ذي الزوله دي او الزول. دا 
غايتو ناس كدا ذي ورق المصاحف تعبر للافئدة كدا من غير تذاكر .
عكس ناس  تاني  تسمع اقول ليك بركة الرحل الفقر وش النحس دا. 
طيب اوك انا عاوز اوصي اختي ( صاحبة الاستشارة)
  حاولي يااختي استحضري اكتر شخصيات مألوفة ليك وللحواليك في حتتكم او حيكم. او منطقتكم 
حاولي اتأثري بيهم وبطباعم صاحبيهم كوني صداقات معاهم   ليش ?لانك حتتلوني بسلوكياتهم وانعالاتهم الايجابية وحيغيروا فيك شوي شوي  
حاولي اتصالحي مع نفسك وحاوري نفسك حديث النفس للنفس .
 ليه ماافرح ليهم?
 لو ماحبيتم ?مامرتاحة نفسيا 
طيب لو حبيتم ? اكيد حارتاح نفسيا 
طيب انا عاوزه شنو ? اكيد عاوزه ارتاح نفسيا

قرري واعزمي جواك انك حتفرحي لغيرك 
يعني مثلا اختك الاصغر منك لو جاها عريس او خطيب 
ماتضايقي وتقولي ليه انا الكبيرة ماعرست. لا حاولي افرحي من جواك من اعماقك وكل مره اسآلي نفسك هل انا فرحانه للحاصل دا حتلق نفسك  مافرحانه  قولي في نفسك لا لازم افرح. حتلق نفسك فرحت شوي. قولي لا لسه كمان  حتلق نفسة فرحتي نوعا ما  تاني قولي لسه كمان .......  يعني تعاندي عقلك لحد مايتقبل احساسك واحولو بكترة التكرار في صالحك .

ربنا اوفقك يااختي 

 اها انا غايتو بقول حقو نحب بعض ونحب الخير لبعض ونواسي بعض ونفرح لبعض عشان نكون سعدا مع بعض
حقو ننزل ويندوز  جديد ونعمل ابديت لمشاعرنا الاجابية ونتصالح مع انفسنا قبل ان نتصالح مع الاخرين.

شكرا

الهادي حامد / اختصاصي العلاج النفس